ಕಂಪನಿಯ ಕಥೆ... !

ಎರಡು ತಾಸಿನಿಂದ ಒಂದೇ ರಸ್ತೆ ಯಲ್ಲಿ ಪ್ರಯಾಣ ಸಾಗಿತ್ತು

ಬಿಡಿಸಿಕೊಂಡು ಹೋಗುವ ಹಾಗಿರಲಿಲ್ಲ , ಅಲ್ಲೇ ಕೂರಲು ಮನಸ್ಸಾಗುತ್ತಿಲ್ಲ 

ಮುಂದೆ , ಹಿಂದೆ ಅಕ್ಕ ಪಕ್ಕ ಎಲ್ಲೆಲ್ಲೂ ಮೈ ಗೆ ಮೈ ತಾಗಿಸಿ ವಾಹನಗಳು ನಿಂತಿತ್ತು 

ಹವಾನಿಯಂತ್ರಿತ ವಾಹನವಾದರೂ , ವಿಚಿತ್ರ ಹಿಂಸೆ ಆಗುತ್ತಿತ್ತು 

ಆಡಿದ್ದೇ ಮಾತುಗಳು ಮತ್ತೆ ಮತ್ತೆ , ಕೇಳಿದ್ದೇ ಹಾಡುಗಳು ಮತ್ತೆ ಮತ್ತೆ ಬರುತ್ತಿತ್ತು 

ಹೊರಗಿನ ಗಾಳಿ ಒಳ ಬರಲು ಸಾಧ್ಯವಿಲ್ಲ , ಒಳಗಿನ ಗಾಳಿ ಹೊರ ಹೋಗುವುದಿಲ್ಲ 

ಅವರವರ ಉಸಿರು ಅವರಿಗೇ ಮತ್ತೆ ಮತ್ತೆ ಹಂಚಿಕೆಯಾಗುತ್ತಿತ್ತು 

ಒಂದು ದಿನದ  ಕಥೆಯಲ್ಲ , ಪ್ರತಿ ದಿನದ , ಪ್ರಯಾಣದ ವ್ಯಥೆಯಾಗಿತ್ತು 

ಉಳಿತಾಯ ಖಾತೆಯಲ್ಲಿ ಹಣ ತುಂಬಿದ್ದರೂ, ಕಿಂಚಿತ್ತು ಸಂತಸವಿರಲಿಲ್ಲ 

ಜೀವನದಲ್ಲಿ ಜಿಗುಪ್ಸೆ , ಸಾಕಾಯ್ತು ಬದುಕು ಎನ್ನುತ್ತಾ ಕುಡಿಯಲು ಕುಳಿತ ಕೋಟ್ಯಾಧೀಶನೊಬ್ಬ 

ಮೇಲಧಿಕಾರಿಯ ಜೊತೆಯಲ್ಲಿ ಕುಡಿದರೆ ತನಗೆ ಲಾಭವಾದೀತೆಂದು , ಕುಡಿಯಲು ಕುಳಿತ ಅಮಾಯಕ ಹೊಸಬ 

ಬಡ್ತಿಯ ಕನಸು , ಸಂಬಳದ ಆಸೆಯಿಂದ ಸುಮ್ಮನೆ ನಗುತ್ತಾ ನಿಂತಿದ್ದ ಹಳ್ಳಿಯ ಹುಡುಗಿ 

ಕೆಲವರ ಬದುಕು ಬದಲಾಗುತ್ತಿತ್ತು , ಕೆಲವರ ಬದುಕು ಹಾಳಾಗುತ್ತಿತ್ತು 

ಸಾಲಗಳು ತೀರುತ್ತಿತ್ತು , ತಂಗಿಯ ಮದುವೆ, ತಂದೆಯ ಜವಾಬ್ದಾರಿ 

ಸ್ವಂತದ ಮನೆ , ಹೀಗೆ ಕನಸುಗಳು ನನಸಾಗುತ್ತಿತ್ತು 

ಒಳ್ಳೆಯದ್ದು ,ಕೆಟ್ಟದ್ದು ,ಹೀಗೆ ಎರಡನ್ನು ತುಂಬಿಕೊಂಡು ಕಂಪನಿ ಮುನ್ನುಗ್ಗುತ್ತಿತ್ತು 

                                                                            -LSS