ಸೂರ್ಯ ಸಾಮ್ರಾಜ್ಯ
ಅಪರಾಹ್ನದ ಸೂರ್ಯ ನೆತ್ತಿ ಮೇಲಿತ್ತು
ಬಿಸಿಲಿನ ಶಾಖ ಬಿರುಸಾಗಿ ಪ್ರಖರವಾಗಿತ್ತು
ಜೀವರಸವನ್ನು ಹೀರಿ , ಜೀವಜಲವನ್ನು ಬರಡು ಮಾಡಿತ್ತು
ಜನಸಾಮಾನ್ಯರು ಬಳಲಿ , ನರಳುವಂತೆ ಮಾಡುತ್ತಿತ್ತು
ಧರೆಯ ಮೇಲೆ ಹೊಗೆಯಾಡುತ್ತಿತ್ತು
ಬಿಸಿ ಗಾಳಿಯು , ಸಿಕ್ಕ ಸಿಕ್ಕವರನ್ನು ಸುಡುತ್ತಿತ್ತು
ಆಗ ತಾನೇ ಚಿಗುರಿದ ಎಲೆಗಳು ಸುಟ್ಟು ಹೋಗುತ್ತಿತ್ತು
ಯಾರ ಮೇಲೂ ಕರುಣೆ ತೋರದೆ ಸೂರ್ಯ ಸಾಮ್ರಾಜ್ಯ ರಾರಾಜಿಸುತ್ತಿತ್ತು
ಆ ಊರಿನಲ್ಲಿ ಇಂತಹ ಬರಗಾಲ ಆವರಿಸಿತ್ತು
ನೀರಿಗಾಗಿ ಹೊಡೆದಾಟ , ನೆರಳಿಗಾಗಿ ಪರದಾಟ
ಯಾರೂ ಯಾರಿಗೂ ಸಹಾಯ ಮಾಡುತ್ತಿರಲಿಲ್ಲ
ಒಗ್ಗಟ್ಟು ಕರಗಿ, ಎಲ್ಲೆಡೆ ಹಗೆಯ ಬೇಗೆ ಹರಡುತ್ತಿತ್ತು
ಅಂದು ಕೂಡ ಬಿರುಬಿಸಿಲು ದಾಳಿಯನು ಮುಂದುವರೆಸಿತ್ತು
ಅಕಸ್ಮಾತ್ತಾಗಿ ಏನೊ ಸುಟ್ಟು ಸ್ಪೋಟವಾದಂತೆ ಸದ್ದಾಯಿತು
ಊರಿನ ಜನ ಹೊರಬಂದು ನೋಡಿದರೆ , ಜೋರಾಗಿ ಗುಡುಗುತ್ತಿತ್ತು
ಮಿಂಚುಗಳ ಬಾಣ ಭೂಮಿಯತ್ತ ಬರುತ್ತಿತ್ತು ,ಮಳೆಯ ಹನಿಗಳು ಊರನ್ನು ಆವರಿಸಿತ್ತು
ಮನೆಯ ಜನರೆಲ್ಲಾ ರಸ್ತೆಗೆ ಇಳಿದು , ಒಟ್ಟಾಗಿ ಕುಣಿದು ಸಂಭ್ರಮಿಸಿದರು
ಬರಗಾಲ ನೀಗಲಿಲ್ಲ , ಬಾಯಾರಿಕೆ ನೀಗಿತ್ತು
ಮಳೆಗಾಲ ಬರಲಿಲ್ಲ , ಧರೆ ಸ್ವಲ್ಪ ತಂಪಾಗಿತ್ತು
ಊರಿಗೆ ಊರೇ , ಅಂದು ರಾತ್ರಿ ನೆಮ್ಮದಿಯ ನಿದ್ರೆ ಮಾಡಿತ್ತು .
- LSS
Comments
Post a Comment