ಮದ್ಯ - ಪ್ರಯಾಣ

             

                                        ಮದ್ಯ  - ಪ್ರಯಾಣ 

ಗೆಳೆಯನ ಸಂಭ್ರಮಾಚರಣೆಯ ಕಾರಣವಾಗಿ 

ಹೊರಟೆನು ಪಂಚತಾರಾ ಹೋಟೇಲಿನ ಕಡೆಗೆ 

ಮಗಳು ಬಾಗಿಲ ಬಳಿ ಬಂದು ಹೇಳಿದಳು 

"ಅಪ್ಪ ನನ್ನ ಬಿಟ್ಟು ಹೋಗಬೇಡ" ಎಂದು ,

ಹಾಲು ಕುಡಿಯುವ ಮುಗ್ಧ ಮಗುವನ್ನು 

ಹೇಗೆ ಕರೆದೊಯ್ಯಲಿ ಮಾಂಸ ಮದ್ಯದ  ಕೂಟಕ್ಕೆ, 

ನೀ ಒಳಗೆ ಹೋಗು , ನಾ ಈಗಲೇ ಬರುವೆ ಎಂದು 

ಪ್ರೀತಿಯಿಂದ  ಮುತ್ತಿಟ್ಟು ,ವಾಹನವೇರಿ ಹೊರಟೆ 

ಬೀರು , ಬ್ರಾಂಡಿಯ ಘಾಟು ವಾಸನೆಯಲ್ಲಿ 

ನಶೆ ಯೇರಿಸುವ ಮಬ್ಬು ಗತ್ತಲಿನಲ್ಲಿ 

ಸ್ತ್ರೀ ಪುರುಷರೆಂಬ , ಬೇಧ ಭಾವವಿರಲಿಲ್ಲ ಅಲ್ಲಿ 

ಹಾಗೂ ,ಹೀಗೂ ,ಧೂಮಪಾನದ ದಟ್ಟ ಹೊಗೆಯ ಭೇದಿಸಿ ಒಳನಡೆದೆ 

ಕೆಲವರಿಗೆ ಅದಾಗಲೇ ಏರಿತ್ತು ,

ಕೆಲವರು ವೇದಿಕೆಯ ಮೇಲೇರಿ ಕುಣಿಯುತ್ತಿದ್ದರು 

ನಾನು ಏರಿಸಿಕೊಳ್ಳುವ ಆಸೆಯಿಂದ ಹೀರಲು ಕುಳಿತೆ ,

ಒಂದರ ನಂತರ , ಮತ್ತೊಂದು , ಇನ್ನೊಂದು ಹೀಗೆ ಸಾಗಿತು ನಿರಂತರವಾಗಿ 

ನಶೆ ಎಂಬುದು ಏರಿತ್ತು ,ಅಚಾತುರ್ಯಗಳ ಮಾಡಲು ಪರವಾನಗಿ ಸಿಕ್ಕಿತ್ತು 

ಯಾರದೋ ಗೆಳತಿ , ಇನ್ಯಾರದೋ ಹೆಂಡತಿ ,ಯಾವುದೋ ಹಾಡು , ಇನ್ಯಾವುದೋ ನೃತ್ಯ 

ವೇದಿಕೆಯ ಮೇಲೆರಿ ಕುಣಿದೆ, ಅರಚಿದೆ, ಕಿರುಚಿದೆ 

ಸಭ್ಯ ಯುವಕನಾಗಿ ಬಂದವನು , ಎಲ್ಲ ಎಲ್ಲೆ ಗಳ ಮೀರಿ ವರ್ತಿಸಿದೆ 

ಅದಾಗಲೇ ಮಧ್ಯ ರಾತ್ರಿ ಯಾಗಿತ್ತು 

ಮನೆಗೆ ಹೋಗುವ ಮನಸ್ಸಾಯಿತು 

ರಕ್ತದ ಕಣ ಕಣ ದಲ್ಲೂ , ನಶೆ ತುಂಬಿಕೊಂಡು 

ಹೊರಟೆ ನನ್ನ ವಾಹನ ವೇರಿ 

ಕಣ್ಣ ದೃಷ್ಟಿಯು ಮಂಕಾಗಿತ್ತು ,ರಸ್ತೆ ಅಸ್ಪಷ್ಟವಾಗಿತ್ತು 

ದಾರಿ ಕಂಡಂತೆ ಸಾಗತೊಡಗಿದೆ, 

ದೂರದಲ್ಲೊಂದು ಪ್ರಖರ ಬೆಳಕು ನನ್ನೆಡೆಗೆ ಬರುತ್ತಿತ್ತು 

ತನ್ನ ಉಜ್ವಲ ಬೆಳಕಿನಿಂದ ನನ್ನ ಆಕ್ರಮಿಸುತ್ತಿತ್ತು 

ಇನ್ನು ಹತ್ತಿರ ಹತ್ತಿರ ಬರತೊಡಗಿತ್ತು ,

ನಾ ಮಂತ್ರ ಮುಗ್ಧನಾಗಿ ಅದರೆಡೆಗೆ ನೋಡುತ್ತಿದ್ದೆ 

ವೇಗ ನಿಯಂತ್ರಿಸಲಾಗಲಿಲ್ಲ , ವಾಹನ ಬೇರೆಡೆಗೆ ತಿರುಗಿಸಲಾಗಲಿಲ್ಲ 

ಒಂದೇ ಕ್ಷಣದಲ್ಲಿ ಆ ವಾಹನ ನನ್ನ ಮೇಲೆ ಹರಿದಿತ್ತು 

"ಅಪ್ಪ ನನ್ನ ಬಿಟ್ಟು ಹೋಗಬೇಡ" ಎಂದಿದ್ದ ಮಗಳ ಮಾತು 

ಕಿವಿಯಲ್ಲಿ ಪ್ರತಿಧ್ವನಿಸಿತ್ತು 

ನೋಡ ನೋಡುತ್ತಿದ್ದಂತೆ ರಸ್ತೆ ಮಧ್ಯದಲ್ಲೇ 

ಪ್ರಾಣ ಹೋಗಿತ್ತು ... 

                                                                          - LSS